Ein heilt tilfeldig fredag kveld

Det var ein heilt vanleg fredag kveld og Camilla hadde nettopp fått besøk i frå Norge og skulle på Denny's, mens eg vurderte dei ulike muligheitene - utan at noko frista spesielt. Heilt tilfeldig stikk Magnus innom og lurar på om eg skal bli med på kino, han og amerikanaren Greg skulle sjå Adventureland. Eg hadde ikkje høyrt noko særleg om filmen, men tenkte kvifor ikkje? Me skulle jo likevel være tilbake på dormen til midnatt.


Kinoen låg eit kvarters tid med toget frå Church stoppen, og me rakk akkurat inn i tide - men med sannsynlegvis dei dårlegaste setane det er muleg å få på ein kino. Eg er sikker på at Greg, som er relativt høg, kunne sparke borti veggen under lerretet. Ti minutt uti filmen tenkte ingen av oss lenger på det. Filmen var utruleg bra, faktisk! Morosam, med eit litt seriøst bakteppe.


Vel ute var me alle oppglødde etter den gode opplevinga, og å reise tilbake til dormen frista ikkje stort. Vêret var mildt, og sporty Magnus kom med den fantastiske ideen: kvifor ikkje gå over Brooklyn Bridge? Som eg sikkert har skrive før, er den brua ein av mine favoritt stader her i byen, og sjølv om det var eit stykke i frå kinoen og klokka allereie var over tolv høyrtes dette ut som ein fantastisk idé! Me la i veg bortover Smith Street og på vegen kom eg på den nydelege parken eg og Camilla kom over når me var i området tidlegare i vinter. Så når me nærma oss East River svinga me ein kort tur nedom Fulton Riverpark, og eg trur begge to vart like overvelma over utsikten som me vart.

Vidare kava me oss opp på brua i den sterkaste vinden eg har kjent her, og lurte veldig på korleis det ville være midt ute på elva. Men me trengte ikkje å frykte noko, vinden roa seg ned etterkvart og me kom oss trygt over. Og på tross av vinden var det måneskinn og ein fantastisk klar kveld - nydeleg!!

Brooklyn Bridge er 1834 meter lang, og var verdas lengste hengebru då den var ferdigbygd i 1883. Det er også den første brua i verda som er bygd med stålkablar, og dette er også det den er så kjent for. Det er eit av dei meste kjente ingeniørkunstverka frå 1800-talet, og i løpet av dei 14 åra det tok å byggje den omkom heile 27 arbeidarar. Den går i frå Brooklyn til lower Manhattan og er den sørlegaste av dei til saman tre bruene som går over East River.

Vel over brua var planen å ta toget rett heim, men ingen av oss følte heilt for det endå. Me la rett og slett i veg uptown for å finne F-toget i staden! Forbi New York City Hall og dei andre kjente bygningane i området merka me at ein liten energipåfylling ikkje hadde vore så dumt. Ingen åpne plassar i Chinatown frista stort, men i Little Italy derimot var det fleire ganske så koselege restaurantar. Me stakk innom ein liten gul kafé når klokka var godt over to, og fekk oss litt god, italiensk nattmat og atmosfære!

Etter litt betalingskluss og ekstra tipsing og sånt bar det strake vegen opp til Houston Street gjennom SoHo. Det var på tide å komme seg tilbake til Brooklyn!

Vel heime, klokka fire i staden for tolv, var i alle fall eg sikker på at dette hadde vore ein av dei beste kveldane i New York - byen der alt skjer tilfeldig!! :)